繁體中文
張婉婷1950年生，係香港電影導演、編劇，香港電影新浪潮嘅代表人物之一。佢出生於香港，祖籍廣東省開平市，早年於香港島半山區嘅英華女學校就讀小學部及中學部，之後升讀香港大學心理系；畢業後到英國布里斯托大學學習文學及戲劇，留英期間曾加入英國廣播公司工作，為旗下紀錄片擔任助導。1978年至1980年佢為香港電台導演電視節目，作品包括《獅子山下》及《屋簷下》中嘅單元、兒童節目《香蕉船》等；1990年代佢曾加入亞洲電視擔任編導，作品包括1993年由亞視新聞製作嘅《時事追擊》中嘅《牟宗三先生特輯》。1982年佢赴美國紐約大學修讀電影，1985年獲邵氏電影公司力荐，首次執導電影《非法移民》，獲香港電影金像獎最佳導演；1987年執導嘅《秋天的童話》大受歡迎，更獲香港電影金像獎最佳電影；1989年嘅《八両金》獲金像獎五項提名，呢三部電影合稱張婉婷嘅「移民三部曲」。1988年佢與羅啟銳合作編寫《七小福》劇本，獲金馬獎最佳劇本獎；較後期作品有描寫中國近代史上三名重要女性嘅《宋家皇朝》，同描寫兩代香港大學生愛情嘅《玻璃之城》。2007年佢獲委任為香港電影發展局非官方委員，2021年起出任該局副主席，2011至2021年間執導紀錄片《給十九歲的我》。