繁體中文
章國明（Alex Cheung Kwok-ming），1951年12月22日喺香港出世，原籍浙江寧海，係香港電影新浪潮嘅代表人物之一。佢自細迷上影像世界，年青時用八毫米攝影機拍咗唔少實驗短片，又同朋友組織「八米厘電影會」，一齊拍片同搞放映。1973年，佢參加香港學生聯會主辦嘅「香港實驗電影比賽」，以《電話鈴聲》《做》《八米厘》等短片，一口氣奪得大會五個獎項當中嘅三個，同屆另外兩位得獎者係吳宇森同黃國兆；同年佢另一齣二十五分鐘短片《異世之所》獲邀參加伊朗電影節。作品後來得導演楚原賞識，邀佢寫劇本。 佢先後加入麗的電視製作宣傳片，同無綫電視菲林組，製作電視單元劇，包括《CID》《年青人》《第一次》《的士司機》《四眼神探》《幻海奇情》等。1979年，佢正式進軍影壇，執導首部長片《點指兵兵》，由泰迪羅賓同梁李少霞監製，票房報捷，實感強烈嘅手法同同期徐克、許鞍華等作品一齊揭開新浪潮序幕。1981年嘅《邊緣人》以臥底警察為題材，寫出執法者夾喺警隊同黑幫之間嘅撕裂，喺第19屆台灣金馬獎連奪最佳導演、最佳原著劇本同最佳男主角三獎，男主角艾迪亦憑此片封帝。《邊緣人》被公認為香港臥底警匪片嘅鼻祖，先後獲《亞洲週刊》選為「二十世紀一百部最偉大的中國電影」之一，以及2011年香港電影資料館「百部不可不看的香港電影」。 此後佢獲邵氏邀請執導科幻片《星際鈍胎》（1983），另拍有《皇家大賊》（1985）、《點指賊賊》（1988）等。佢嘅鏡頭多寫邊緣青年、執法者同都市陰暗面，喺新浪潮中以寫實警匪路線別樹一幟。1996年起，佢為廉政公署製作劇集，1998年正式加入廉政公署，協助拍攝劇集同宣傳短片。