繁體中文
胡楓（1932年1月18日出生），本名胡繼修，行內尊稱「修哥」，祖籍廣東廣州白雲區神山鎮，喺香港成長，身兼演員、節目主持同歌手，現為無綫電視部頭合約藝員。佢爸爸喺香港開古董公司，家族由爺爺輩起已做古董生意，佢童年在廣州西關生活，1952年畢業於香港培英中學。1953年，佢投考大成影片公司，初次試鏡有約一千人報考，佢雖然患有嚴重口吃、本來受評判質疑，第二日卻收到錄用通知；藝名取楓樹嘅「楓」字，寓意演藝事業四季「長紅」。首部電影《男人心》佢同芳艷芬合演，令佢一炮而紅。其後佢同薛家燕、蕭芳芳、陳寶珠等人合演大量歌舞片，舞藝出眾，得「舞王修」之名。1950至60年代係粵語片嘅黃金時期，佢片約不斷，戲路涵蓋愛情文藝片、喜劇同歌舞片，並曾推出多張唱片，歌影雙棲。1960年代佢亦參與創辦藝聯影業同真善美影片公司，涉足電影製作。佢早年曾任商業一台《胡言楓語》節目播音員；1970年代中粵語片式微，佢轉向電視發展，先加入麗的電視，1987年轉投無綫電視，參演唔少電視劇同綜藝節目，其後多演配角，其中1988年劇集《誓不低頭》佢飾演一名口吃律師。佢有武打底子卻無做武打明星，反而係李小龍同成龍（當時仍係李小龍嘅替身）嘅演技導師。佢嘅演藝生涯逾七十年，參演電影超過一百部，橫跨粵語片、國語片同電視劇，並係張學友、黎明嘅契爺，圈中人緣極佳。2003年，佢獲香港電影金紫荊獎終身成就獎同無綫電視萬千光輝演藝大獎；2022年，無綫為九十歲嘅佢舉行《人生90好楓Show》賀壽，同年佢以九十歲之齡喺紅館舉行演唱會，成為最年長喺紅館開個人演唱會嘅歌手；2023年，佢獲第四十一屆香港電影金像獎終身成就獎，表揚佢多年來樂於嘗試唔同角色嘅敬業精神。