繁體中文
黎北海（1889年—1955年12月26日），廣東新會人，係香港默片年代嘅開拓者，後世稱佢做「香港電影之父」。佢同胞弟黎民偉都係本地最早一批投身電影製作嘅人。1909年，黎北海喺上海亞細亞影戲公司攝製嘅短片《偷燒鴨》中飾演警察，係香港人最早嘅銀幕演出之一。1913年，佢同胞弟黎民偉，聯同俄裔美國人布拉斯基合組華美影片公司，執導兼演出《莊子試妻》，呢部戲被視為香港第一部故事短片；戲中妻子一角由黎民偉反串，婢女一角由黎民偉妻子嚴珊珊飾演，嚴珊珊亦因此被視為中國第一位電影女演員。1921年7月12日，佢同黎海山、黎民偉一齊創辦新世界戲院，係香港首間全部由港人集資興建嘅新型戲院，本地放映業自此開始成形。1923年，黎氏兄弟以招股方式籌組民新製造影畫片有限公司，但政府遲遲唔批片廠用地，開廠計劃一直懸空，黎民偉惟有先到各地拍攝紀錄片，再移師廣州籌拍劇情片。1924年黎北海移居廣州，1925年執導長片《胭脂》，一般認為係中國第一部長故事片。1928年，佢創立香港影片公司，之後六年獨力支撐本地製片，先後開辦三班演員養成所，唐醒圖、胡戎、石友宇等人都係佢嘅學生。1931年聯華影片公司在香港設廠，民新併入聯華，黎北海獲委任為聯華香港分廠廠長，同時兼任「聯華演員養成所」所長及導師。1933年，佢同唐醒圖合資創辦中華製造聲默影片有限公司，先後執導香港第一部局部有聲片《良心》同全有聲片《傻仔洞房》；後者喺9月20日公映，由粵劇名丑廖夢覺同曲藝名伶黃佩瑛主演，係香港首部全有聲粵語電影，粵劇同粵曲藝人首次喺銀幕上開口演唱。1934年，佢喺中華影片公司執導《陳宮罵曹》同《薄幸》。因為屢次創辦電影事業耗盡家財，黎北海終於1935年退出影壇，轉營其他生意。1955年12月26日，佢喺廣州逝世，終年六十六歲。