繁體中文
生喺廣東新會，八歲隨家人移居香港。1941年香港淪陷之後，曾到越南教小學。1947年，陳焯生返回香港。喺兄長介紹下進新世界戲院工作，並隨院主張民權參同攝製影片工作。陳其後喺灣仔天樂里經營大聯冰室，成為其電影公司後來嘅名字同財政基礎。1950年成立毅成影業公司，承包拍攝由院線出資嘅粵語片《從心所欲》（1952）、《飛來艷福》（1952）。其後又成立大聯影業公司攝製電影，出品了《花月爭輝》（1952）、 《花月又重圓》（1952）、《萬里行屍》（1954）、 《無頭東宮生太子》（上、下集，1957）等粵語片。1959年，陳焯生開始擔任導演，首作係《紅孩兒水晶宮救母》，之後又拍咗其姊妹作《鐵扇公主神火破天門》。大聯嘅出品，以大鑼大鼓嘅粵劇戲曲片為主。佢執導嘅影片中，最有名嘅係一系列由司徒安編劇、新馬師曾主演嘅小市民喜劇《撲水世界》（1963）、《通天師父》（1964）、 《矇查查搵食》（1967）、《得咗》（1969）等。另外，又曾同楊工良聯合導演咗由于素秋主演並展示大量北派功架嘅《鍾無艷掛帥征西》（1962）。妻子黃美儀係多部大聯出品電影嘅製片同監製，同陳焯生並肩經營電影事業。1971年，粵語片完全停產前，最後公映嘅一部粵語片《獅王之王》亦為大聯嘅出品。除攝製影片外，陳焯生都經營粵語片嘅二輪發行生意。陳焯生畢生製作同發行咗二百多部電影，1974年結束香港所有生意，舉家移民美國。轉行任針炙師。2017年9月15日逝世。