繁體中文
原名莊淑女，福建晉江人，生喺新加坡（其時隸屬馬來亞）。從小學習歌舞，14歲出道喺歌台獻藝，展現出歌、舞、戲劇多方面嘅才華。16歲組成「白雪歌舞團」巡迴表演，甚受歡迎，被譽為「歌國仙女」。21歲組成三十餘人嘅「莊雪芳巡迴歌詠團」，自任團長，喺星馬各地巡迴表演。1956年，率團到菲律賓，大受當地華僑歡迎。1957年，來香港拍攝電影，先客串演出邵氏出品嘅國語片《神秘美人》（1957），繼而擔綱演出廈語片《天涯歌女》（1958），並隨片往台灣登台。因演出華廈影業公司同新加坡榮華影業公司聯合出品之 《龍交龍鳳交鳳》（1958） 而走紅，並主演了《熱女郎》（1958）、《望夫歸》（1958）、《番婆弄》（1958）同《野赤查某戇男子》（1959）等電影，獲得了「廈語片皇后」嘅稱號。1958年，自資創立咗莊氏影業公司，製作多部廈語片，包括創業作《十七十八正當時》（1958）、 《好花插牛屎》（1959）、 《弄破醋甕》（1959）、《雙雙對對》（又名《多角戀愛》，1959）。1960年，隨影片《雙雙對對》往台灣登台，並學習平劇。1962年，演出新加坡華僑投資嘅電影《龍山寺之戀》之後，展開長達17個月嘅巡迴隨片登台表演，到東南亞各地演唱國、英、泰、閩、粵、馬來語嘅歌曲。喺泰國表演期間，更演出泰國電影《月光》（1964）。其後一度暫別銀幕，1969年再往台灣，演出國語片《神傘奇俠》（1972）、《五色仙女》（1973）等影片。喺佢嘅電影生涯中，演出超過三十部國語片同廈語片。莊雪芳婚後息影，定居新加坡，退休後仍經常為慈善機構作義務演出，為社會作出貢獻。