繁體中文
原名李滿銓，廣東順德人，年輕時曾喺佛山茶樓當學徒，因具演戲天賦，得茶客粵劇名伶小生奕賞識，收為粵劇學徒，業餘學唱粵曲同做粵劇，慢慢踏上粵劇演員之路。最初加入粵劇新中華劇團，多演小生戲；後來轉投永壽年劇團，開始擔任丑生角色。戰前先後參加國豐年、新生活、勝光明等粵劇名班，主演《千里攜蟬》、 《飛渡玉門關》、 《甜姐兒》、 《烽火霓裳》等名劇。戰亂期間，曾喺美加走埠，1939年攜眷到美國。1940年，喺美國誕下男嬰李振藩（即日後成為國際電影巨星嘅李小龍）。戰後為錦添花台柱之一，主演 《三盜九龍杯》、 《銅網陣》、 《兩個煙精掃長堤》等名劇。1958年，退出舞台，參演嘅最後一個劇團係梨園樂。擅演丑生戲同爛衫戲，更別創「煙喉」。佢同廖俠懷、半日安、葉弗弱合稱「四大名丑」。又喜歡培育後進，如芳艷芬同新海泉，都曾經佢指導同栽培。1939年，開始拍電影，主演嘅第一部影片係《打劫陰司路》。1939 至 61年間，演出超過一百部電影，名作有《乞米養狀元》（1947）、 《兩個煙精掃長堤》（1948）、《垃圾天堂》（1949）、 《細路祥》（1950）、 《火網梵宮十四年》（1958）、 《三盜九龍杯》（1959）等。 《孤兒救祖》（1961） 係佢主演嘅最後一部影片。1965年，喺香港病逝。