繁體中文
原名陳淑良，廣東順德大良人，喺廣州出生。曾就讀香港嶺英中學同聖保祿英文中學。其父係有「小生王」之稱嘅粵劇名伶白駒榮。自幼喜愛粵劇，12 歲時拜粵劇名伶薛覺先為師，改藝名為白雪仙，曾喺覺先聲劇團演出；之後又師事音樂家冼幹持學習唱工。香港淪陷期間，為咗生活曾喺歌壇演唱。16 歲出任錦添花粵劇團正印花旦，繼而參加新聲劇團，開始同粵劇名伶任劍輝合作。喺新聲主演嘅名劇有《海棠淚》、《不如歸》、《紅樓夢》等。繼後參加咗錦添花、大鳳凰、金鳳屏、寶豐、五福等各大劇團嘅演出。1953年喺鴻運、多寶同利榮華等劇團任正印花旦。1956年， 同任劍輝組成仙鳳鳴劇團， 演出 《牡丹亭驚夢》、《帝女花》、《紫釵記》、《再世紅梅記》、 《白蛇新傳》等名劇。早期以演刁蠻戲聞名，後期則擅演悲劇。1947年主演嘅第一部電影係新聲劇團戲寶《晨妻暮嫂》。1947 至 68年間，主演超過一百二十部電影，名作有《紅白牡丹花》（1952）、 《富士山之戀》（1954）、 《紫釵記》（1959）、 《帝女花》（1959）等。1961年成立仙鳳鳴影片公司，拍攝了《李後主》（1968），其後退出影壇。1963年偕任劍輝成立雛鳳鳴劇團，致力培育新人，不斷扶持接班人，龍劍笙、梅雪詩仍演出粵劇至今。佢演戲時好認真同投入， 又不斷革新粵劇同栽培後輩， 對粵劇嘅貢獻良多。1989年 11月 29日任劍輝病逝，為紀念任氏，佢成立咗任白慈善基金會，喺1990年公開義映《李後主》。1996年，獲香港演藝學院頒發榮譽院士；2001年，榮獲第二十屆香港電影金像獎 「終身成就獎」；2004年，獲香港大學頒授名譽文學博士；獲香港藝術發展局頒發 2007年度「香港藝術發展獎──終身成就獎」；2013年，獲香港特別行政區政府頒發「金紫荊星章」。