繁體中文
郝德傑（Andrew Caldecott，1884–1951）係英國殖民地官員，1884年10月26日喺英格蘭肯特郡出生，畢業於牛津大學埃克塞特學院，1907年獲古典學學士學位，同年11月加入殖民地部並前赴馬來亞，喺森美蘭出任見習官，長期喺馬來亞同海峽殖民地任職，歷任區域官員至海峽殖民地輔政司（1933至1935年），以善於排難解紛同調和種族關係見稱，並曾出任馬來亞足球總會首任會長。1934年2月至11月，佢一度署理海峽殖民地總督。1935年12月12日，佢抵港就任第十九任香港總督，上任時罕有地穿著便服。任內佢帶領港府推行多項革新：1936年1月1日，原有潔淨局正式改組為市政局；啟德機場喺佢任內首度有定期航班升降，銀禧水塘同瑪麗醫院亦相繼落成啟用。隨着中國局勢動盪，佢多次同國民政府官員會面，1936年9月更喺廣州宴請蔣介石。同期香港成為內地資金、人才同難民嘅避風港，逾十萬難民湧入，人口同工商活動明顯上升；佢任內亦處理防空、防務同衞生問題，並主張擢升華人公務員。1937年4月16日，佢因錫蘭民族運動高漲、局勢不穩而匆匆卸任，離任時社會普遍惋惜，曾有市民向英國外相艾登請願挽留，惜未成功；其後佢調任錫蘭總督至1944年9月。晚年佢居於英國，曾任殖民地服務任命委員會委員，並出版《似鬼非鬼》（1947）同《藍火》（1948）兩本靈異故事集。1951年7月14日，佢喺英格蘭蘇塞克斯逝世。九龍塘郝德傑道以佢命名。